Octávo Kaléndas Augústi
_
Sancti Jacóbi Apóstoli, qui éxstitit beáti Joánnis Evangelístæ frater; et, prope festum Paschæ ab Heróde Agríppa decollátus, primus ex Apóstolis corónam martýrii percépit. Ejus sacra ossa, ab Hierosólymis ad Hispánias hoc die transláta, et in últimis eárum fínibus apud Gallǽciam recóndita, celebérrima illárum géntium veneratióne, et frequénti Christianórum concúrsu, religiónis et voti causa illuc adeúntium, pie colúntur.
In Lýcia sancti Christóphori Mártyris, qui, sub Décio, virgis férreis attrítus, et e flammæ æstuántis incéndio supérna Christi virtúte servátus, ad últimum, sagittárum íctibus confóssus, cápitis obtruncatióne martýrium complévit.
Barcinóne, in Hispánia, natális beáti Cucuphátis Mártyris, qui, in persecutióne Diocletiáni, sub Daciáno Prǽside, plúrimis torméntis superátis, tandem, percússus gládio, victor migrávit in cælum.
In Palæstína sancti Pauli Mártyris, qui, in persecutióne Maximiáni Galérii, sub Firmiliáno Prǽside, cápitis damnátus, et, exíguo orándi spátio impetráto, primum pro contribúlibus suis, deínde pro Judǽis et Gentílibus, ut fídei veritátem agnóscerent, póstea pro circumstántium multitúdine, demum pro Júdice qui ipsum damnáverat, et pro carnífice a quo feriéndus erat, Deum toto corde precátus, martýrii corónam, abscíssis cervícibus, accépit.
Furcónii, in Vestínis, sanctórum Mártyrum Sipontinórum Floréntii et Felícis.
Córdubæ, in Hispánia, sancti Theodemíri, Mónachi et Mártyris.
In Palæstína sanctæ Valentínæ Vírginis, quæ, cum ad aram, ut immoláret, addúcta esset, eámque cálcibus evertísset, prius diríssime cruciáta est; deínde, una cum sócia Vírgine, in ignem conjécta cucúrrit ad Sponsum.
Tréviris sancti Magneríci, Epíscopi et Confessóris.