Duodécimo Kaléndas Septémbris
_
Sanctæ Joánnæ-Francíscæ Frémiot de Chantal, Víduæ, quæ Ordinis Sanctimoniálium Visitatiónis sanctæ Maríæ fuit Institútrix, cujus natális dies Idibus Decémbris memorátur.
Romæ, in agro Veráno, sanctæ Cyríacæ, Víduæ et Mártyris; quæ, in persecutióne Valeriáni cum se súaque ómnia in Sanctórum ministério impendísset, demum pro Christo martýrium súbiens, vitam quoque ipsam libénter impéndit.
In território Gavalitáno sancti Priváti, Epíscopi et Mártyris; qui passus est in persecutióne Valeriáni et Galliéni.
Salónæ, in Dalmátia, sancti Anastásii Corniculárii, qui, cum vidéret beátum Agapítum constánter torménta perferéntem, convérsus est ad fidem, et, pro confessióne nóminis Christi, jubénte Aureliáno Imperatóre, interémptus, Martyr migrávit ad Dóminum.
In Sardínia natális sanctórum Mártyrum Luxórii, Cisélli et Cameríni; qui, in persecutióne Diocletiáni sub Délphio Prǽside gládio cæsi sunt.
Eódem die sanctórum Mártyrum Bonósi et Maximiáni.
Fundis, in Látio, sancti Patérni Martyris, qui ab Alexandría Romam venit ad Apostolórum memórias; et inde in agrum Fundánum secéssit, atque ibi, cum Mártyrum córpora sepelíret, a Tribúno comprehénsus est, et in vinculis expirávit.
Edéssæ, in Sýria, sanctórum Mártyrum Bassæ, et filiórum, id est Thegónii, Agápii et Fidélis; quos, in persecutióne Maximiáni, pia mater exhórtans, martýrio coronátos præmísit ad palmam, et, truncáto cápite, gaudens secúta est cum victória.
Verónæ sancti Euprépii, Epíscopi et Confessóris.
Item sancti Quadráti Epíscopi.
Arvérnis, in Gállia, sancti Sidónii Epíscopi, doctrína et sanctitáte conspícui.
Senis in Túscia beáti Bernárdi Ptolomǽi Abbátis, Congregatiónis Olivetánæ Fundatóris.