Octávo Idus Octóbris
_
Sanctæ Birgíttæ Víduæ, cujus dies natális décimo Kaléndas Augústi, ac Translátio Nonis Octóbris recensétur. 
Sanctórum Mártyrum Sérgii, Bacchi, Marcélli et Apuléji, quorum dies natális precedénti die refértur.
Eódem die natális beáti Simeónis senis, qui in Evangélio Dóminum Jesum, præsentátum in Templo, suis in ulnis accepísse ac de illo prophetásse légitur.
Laodicéæ, in Phrýgia, sancti Artémonis Presbýteri, qui per ignem, sub Diocletiáno, martýrii corónam accépit.
Thessalonícæ sancti Demétrii Procónsulis, qui, cum plúrimos ad Christi fidem perdúceret, ídeo, Maximiáni Imperatóris jussu lánceis confóssus, martýrium consummávit.
Ibídem sancti Néstoris Mártyris.
Híspali, in Hispánia, sancti Petri Mártyris.
Cæsaréæ, in Palæstína, pássio sanctæ Reparátæ, Vírginis et Mártyris; quæ, cum nollet idólis sacrificáre, sub Décio Imperatóre, váriis tormentórum genéribus cruciátur, ac demum gládio percútitur. Ipsíus autem ánima, in colúmbæ spécie, de córpore égredi cælúmque conscéndere visa est.
In território Laudunénsi natális sanctæ Benedíctæ, Vírginis et Mártyris.
Ancónæ sanctárum Palatiátis et Lauréntiæ, quæ, in persecutióne Diocletiáni, sub Dióne Prǽside, in exsílium deportátæ, labóribus et ærúmnis conféctæ sunt.
Rotómagi sancti Evódii, Epíscopi et Confessóris.
Hierosólymis sanctæ Pelágiæ, cognoménto Pæniténtis.