Quartodécimo Kaléndas Novémbris
_
Sancti Petri de Alcántara, Sacerdótis ex Ordine Minórum et Confessóris, qui migrávit in cælum prídie hujus diéi. 
Romæ natális sanctórum Mártyrum Ptolomǽi et Lúcii, sub Marco Antoníno. Horum prior (ut scribit Justínus Martyr), cum impudícam mulíerem ad Christi convertísset fidem, et castitátem cólere docuísset, ídeo, ab impúro viro apud Præféctum Urbícium accusátus, multo témpore squalóre cárceris macerátus est, et ad últimum, cum de Christi magistério pública confessióne testarétur, jussus est duci ad mortem; Lúcius quoque, cum Urbícii senténtiam improbáret et se Christiánum líbere faterétur, símilem senténtiam excépit; quibus et álius tértius adjúnctus est, qui étiam eódem supplício damnátus fuit.
Antiochíæ sanctórum Mártyrum Beroníci, Pelágiæ Vírginis, et aliórum quadragínta novem.
In Ægýpto sancti Vari mílitis, qui, sub Maximíno Imperatóre, dum sanctos septem Mónachos in cárcere deténtos visitáret atque refíceret, vóluit, uno ex ipsis defúncto, in ejus locum subrogári; atque ita cum illis, sævíssima passus, martýrii palmam adéptus est.
Ebróicis, in Gállia, sancti Aquilíni, Epíscopi et Confessóris.
In território Aurelianénsi deposítio sancti Veráni Epíscopi.
Apud Salérnum sancti Eustérii Epíscopi.
In monastério Silvæ Necténsis, in Hibérnia, sancti Ethbíni Abbátis.
Oxónii, in Anglia, sanctæ Fredeswíndæ Vírginis.