Nonis Novémbris
_
Sancti Zacharíæ, Sacerdótis et Prophétæ, qui pater éxstitit beáti Joánnis Baptístæ, Præcursóris Dómini.
Item sanctæ Elísabeth, ejúsdem sanctíssimi Præcursóris matris.
Tarracínæ, in Campánia, natális sanctórum Mártyrum Felícis Presbýteri, et Eusébii Mónachi. Ex his Eusébius, cum sepelísset sanctos Mártyres Juliánum et Cæsárium, et multos convérteret ad fidem Christi, quos sanctus Felix Présbyter baptizábat, una cum ipso Felíce tentus est; et, ad Júdicis forum ducti nec superáti, inde in cárcerem inclúsi, ambo, nocte eádem, cum sacrificáre noluíssent, decolláti sunt.
Eméssæ, in Phœnícia, sanctórum Mártyrum Galatiónis et Epistémis cónjugis, qui in Décii persecutióne, flagris cæsi, mánibus pedibúsque et lingua ínsuper mutiláti, dénique, truncáto cápite, martýrium consummárunt.
Item sanctórum Mártyrum Domníni, Theótimi, Philóthei, Silváni et Sociórum, sub Maximíno Imperatóre.
Medioláni sancti Magni, Epíscopi et Confessóris.
Bríxiæ sancti Dominatóris Epíscopi.
Tréviris sancti Fibítii, qui ex Abbáte factus est ejúsdem civitátis Epíscopus.
Aureliánis, in Gállia, sancti Læti, Presbýteri et Confessóris.