Décimo séptimo Kaléndas Januárii
_
Sancti Eusébii, Epíscopi Vercellénsis et Mártyris; cujus dies natális Kaléndis Augústi, et Ordinátio décimo octávo Kaléndas Januárii refértur.
Sanctórum Trium Puerórum, id est Ananíæ, Azaríæ et Misaélis; quorum córpora apud Babylóniam, sub quodam specu, sunt pósita.
Ravénnæ sanctórum Mártyrum Valentíni, magístri mílitum, ejúsque fílii Concórdii, atque Navális et Agrícolæ; qui, in persecutióne Maximiáni, pro Christo passi sunt.
Fórmiis, in Campánia, sanctæ Albínæ, Vírginis et Mártyris, sub Décio Imperatóre.
In Africa pássio plurimárum sanctárum Vírginum, quæ, in persecutióne Wandálica, sub Ariáno Rege Hunneríco, suspéndia, póndera laminásque ignítas perpéssæ, martýrii agónem felíciter consummárunt.
Viénnæ, in Gállia, beáti Adónis, Epíscopi et Confessóris.
In Hibérnia sancti Beáni Epíscopi.
Gazæ, in Palæstína, sancti Ireniónis Epíscopi.