02-25# Ex Régula Sancti Patri Nostri Benedícti. Caput 19: De disciplína psalléndi 
_
Ubíque crédimus divínam esse præséntiam et óculos Dómini in omni loco speculári bonos et malos, máxime tamen hoc sine áliqua dubitatióne credámus, cum ad opus divínum adsístimus. Ideo semper mémores simus quod ait Prophéta: Servíte Dómino in timóre, et íterum: Psállite sapiénter, et: In conspéctu angelórum psallam tibi. Ergo considerémus quáliter opórteat in conspéctu Divinitátis et angelórum ejus esse, et sic stemus ad psalléndum, ut mens nostra concórdet voci nostræ.