02-28# Ex Régula Sancti Patri Nostri Benedícti. Caput 22: Quómodo dórmiant mónachi 
_
Sínguli per síngula lecta dórmiant. Lectistérnia pro modo conversatiónis secúndum dispensatiónem abbátis sui accípiant. Si potest fíeri omnes in uno loco dórmiant; sin autem multitúdo non sinit, deni aut vicéni cum senióribus qui super eos sollíciti sint, pausent. Candéla júgiter in eádem cella árdeat usque mane. Vestíti dórmiant et cincti cíngulis aut fúnibus, ut cultéllos suos ad latus suum non hábeant dum dórmiunt, ne forte per sómnium vúlnerent dormiéntem; et ut paráti sint mónachi semper et, facto signo absque mora surgéntes, festínent ínvicem se præveníre ad opus Dei, cum omni tamen gravitáte et modéstia. Adulescentióres fratres juxta se non hábeant lectos, sed permíxti cum senióribus. Surgéntes vero ad opus Dei ínvicem se moderáte cohorténtur propter somnulentórum excusatiónes.