04-18# Ex Régula Sancti Patri Nostri Benedícti. Caput 63: De órdine congregatiónis 
_
Ordines suos in monastério ita consérvent ut conversatiónis tempus, ut vitæ méritum discérnit atque abbas constitúerit. Qui abbas non contúrbet gregem sibi commíssum nec, quasi líbera utens potestáte, injúste dispónat áliquid, sed cógitet semper quia de ómnibus judíciis et opéribus suis redditúrus est Deo ratiónem. Ergo secúndum órdines suos quos constitúerit vel quos habúerint ipsi fratres, sic accédant ad pacem, ad communiónem, ad psalmum inponéndum, in choro standum. Et in ómnibus omnío locis ætas non discérnat órdines nec præjúdicet, quia Sámuhel et Dánihel púeri presbýteros judicavérunt. Ergo, excépto hos quos, ut díximus, altióri consílio abbas prætúlerit vel degradáverit certis ex causis, réliqui omnes ut convertúntur ita sint ut verbi grátia qui secúnda hora diéi vénerit in monastério juniórem se nóverit illíus esse qui prima hora venit diéi, cujúslibet ætátis aut dignitátis sit. Púeris per ómnia ab ómnibus disciplína conserváta.