[Ant 1]
Sapiéntia * ædificávit sibi domum, excídit colúmnas septem, súbdidit sibi gentes, superbórum et sublímium colla própria virtúte calcávit.

[Lectio1]
Incípiunt Parábolæ Salomónis
!Prov 1:1-6
1 Parábolæ Salomónis, fílii David regis Israël, 
2 ad sciéndam sapiéntiam et disciplínam, 
3 ad intelligénda verba prudéntiæ et suscipiéndam eruditiónem doctrínæ, justítiam et judícium et æquitátem, 
4 ut detur párvulis astútia, adolescénti sciéntia et intelléctus. 
5 Audiens sápiens sapiéntior erit, et intéllegens gubernácula possidébit: 
6 animadvértet parábolam et interpretatiónem, verba sapiéntum et ænígmata eórum.

[Responsory1]
R. In princípio Deus ántequam terram fáceret, priúsquam abýssos constitúeret, priúsquam prodúceret fontes aquárum, 
* Antequam montes collocaréntur, ante omnes colles generávit me Dóminus.
V. Quando præparábat cælos, áderam, cum eo cuncta compónens.
R. Antequam montes collocaréntur, ante omnes colles generávit me Dóminus.

[Lectio2]
!Prov 1:7-14
7 Timor Dómini princípium sapiéntiæ. Sapiéntiam atque doctrínam stulti despíciunt. 
8 Audi, fili mi, disciplínam patris tui et ne dimíttas legem matris tuæ, 
9 ut addátur grátia cápiti tuo et torques collo tuo. 
10 Fili mi, si te lactáverint peccatóres, ne acquiéscas eis: 
11 si díxerint: Veni nobíscum, insidiémur sánguini, abscondámus tendículas contra insóntem frustra, 
12 deglutiámus eum sicut inférnus vivéntem et íntegrum quasi descendéntem in lacum; 
13 omnem pretiósam substántiam reperiémus, implébimus domos nostras spóliis:
14 sortem mitte nobíscum, marsúpium unum sit ómnium nostrum.

[Responsory2]
R. Gyrum cæli circuívi sola, et in flúctibus maris ambulávi, in omni gente et in omni pópulo primátum ténui: 
* Superbórum et sublímium colla própria virtúte calcávi.
V. Ego in altíssimis hábito, et thronus meus in colúmna nubis.
R. Superbórum et sublímium colla própria virtúte calcávi.

[Lectio3]
!Prov 1:15-19
15 Fili mi, ne ámbules cum eis: próhibe pedem tuum a sémitis eórum; 
16 pedes enim illórum ad malum currunt, et festínant ut effúndant sánguinem. 
17 Frustra autem jácitur rete ante óculos pennatórum. 
18 Ipsi quoque contra sánguinem suum insidiántur et moliúntur fraudes contra ánimas suas. 
19 Sic sémitæ omnis avári: ánimas possidéntium rápiunt.

[Responsory3]
R. Emítte, Dómine, sapiéntiam de sede magnitúdinis tuæ, ut mecum sit et mecum labóret: 
* Ut sciam, quid accéptum sit coram te omni témpore.
V. Da mihi, Dómine, sédium tuárum assistrícem sapiéntiam.
R. Ut sciam quid accéptum sit coram te omni témpore.
&Gloria
R. Ut sciam quid accéptum sit coram te omni témpore.

[Lectio4]
Ex Tractatu sancti Ambrósii Epíscopi in Psalmum centésimum décimum octavum
!Sermo 5, n. 36-37
Initium esse sapiéntiæ timórem Dómini, dicit prophéta. Quid est autem initium sapiéntiæ, nisi sæculo renuntiáre? Quia sápere sæcularia, stultítia est. Dénique sapiéntiam hujus mundi, stultítiam esse apud Deum, Apóstolus dicit. Sed et ipse timor Dómini, nisi secúndum sciéntiam sit, nihil prodest, immo obest plurimum. Síquidem Judæi habent zelum Dei; sed quia non habent secúndum sciéntiam, in ipso zelo et timóre majórem cóntrahunt divinitátis offensam. Quod circumcídunt infántulos suos, quod sábbata custódiunt, timórem Dei habent; sed quia nesciunt legem spiritalem esse, circumcídunt corpus, non cor suum.

[Responsory4]
R. Da mihi, Dómine, sédium tuárum assistrícem sapiéntiam, et noli me reprobáre a púeris tuis: 
* Quóniam servus tuus sum ego, et fílius ancíllæ tuæ.
V. Mitte illam de sede magnitúdinis tuæ, ut mecum sit et mecum labóret.
R. Quóniam servus tuus sum ego, et fílius ancíllæ tuæ.

[Lectio5]
Et quid de Judǽis dico? Sunt étiam in nobis qui habent timórem Dei, sed non secúndum sciéntiam, statuéntes durióra præcepta, quæ non possit humana condítio sustinére. Timor in eo est, quia vidéntur sibi consúlere disciplinæ, opus virtútis exígere; sed inscítia in eo est, quia non compatiúntur natúræ, non æstimant possibilitátem. Non sit ergo irrationábilis timor. Etenim vera sapiéntia a timóre Dei íncipit, nec est sapiéntia spiritalis sine timóre Dei; ita timor sine sapiéntia esse non debet.

[Responsory5]
R. Inítium sapiéntiæ timor Dómini: 
* Intelléctus bonus ómnibus faciéntibus eum: laudátio ejus manet in sǽculum sǽculi.
V. Diléctio illíus custódia legum est: quia omnis sapiéntia timor Dómini.
R. Intelléctus bonus ómnibus faciéntibus eum: laudátio ejus manet in sǽculum sǽculi.

[Lectio6]
Basis quædam verbi est timor sanctus. Sicut enim simulacrum aliquod in basi statúitur, et tunc majórem habet grátiam, cum in basi státua fúerit collocata, standíque áccipit firmitátem: ita verbum Dei in timóre sancto mélius statúitur, fortius radicátur in péctore timéntis Dóminum; ne labátur verbum de corde viri, ne veniant vólucres et áuferant illud de incuriosi et dissimulántis afféctu.

[Responsory6]
R. Verbum iníquum et dolósum longe fac a me, Dómine: 
* Divítias et paupertátem ne déderis mihi, sed tantum víctui meo tríbue necessária.
V. Duo rogávi te, ne déneges mihi ántequam móriar.
R. Divítias et paupertátem ne déderis mihi, sed tantum víctui meo tríbue necessária.
&Gloria
R. Divítias et paupertátem ne déderis mihi, sed tantum víctui meo tríbue necessária.

[Responsory7]
R. Dómine, Pater et Deus vitæ meæ, ne derelínquas me in cogitátu malígno: extolléntiam oculórum meórum ne déderis mihi, et desidérium malígnum avérte a me, Dómine; aufer a me concupiscéntiam, 
* Et ánimo irreverénti et infruníto ne tradas me, Dómine.
V. Ne derelínquas me, Dómine, ne accréscant ignorántiæ meæ, nec multiplicéntur delícta mea.
R. Et ánimo irreverénti et infruníto ne tradas me, Dómine.

[Responsory8]
@Tempora/Pent01-0:Responsory8