[Lectio1]
De libro primo Machabæórum
!1 Mac 1:17-20
17 Et parátum est regnum in conspéctu Antíochi, et cœpit regnáre in terra Ægýpti, ut regnáret super duo regna, 
18 et intrávit in Ægýptum in multitúdine gravi, in cúrribus et elephántis et equítibus et copiósa návium multitúdine, 
19 et constítuit bellum advérsus Ptolemǽum regem Ægýpti, et véritus est Ptolemǽus a fácie ejus et fugit, et cecidérunt vulneráti multi,
20 et comprehéndit civitátes munítas in terra Ægýpti et accépit spólia terræ Ægýpti.

[Responsory1]
R. Dixit Judas Simóni fratri suo: Elige tibi viros et vade, líbera fratres tuos in Galilǽam; ego autem et Jónathas frater tuus íbimus in Galaadítim: 
* Sicut fúerit volúntas in cælo, sic fiat.
V. Accingímini, fílii poténtes, et estóte paráti: quóniam mélius est nobis, mori in bello, quam vidére mala gentis nostræ et sanctórum.
R. Sicut fúerit volúntas in cælo, sic fiat.

[Lectio2]
!1 Mac 1:21-23
21 Et convértit Antíochus, postquam percússit Ægýptum in centésimo et quadragésimo tértio anno, et ascéndit ad Israël.
22 Et ascéndit Jerosólymam in multitúdine gravi,
23 et intrávit in sanctificatiónem cum supérbia, et accépit altáre áureum, et candelábrum lúminis, et univérsa vasa ejus, et mensam propositiónis, et libatória, et phíalas, et mortaríola áurea, et velum, et corónas, et ornaméntum áureum, quod in fácie templi erat: et commínuit ómnia.

[Responsory2]
R. Ornavérunt fáciem templi corónis áureis, et dedicavérunt altáre Dómino:
* Et facta est lætítia magna in pópulo.
V. In hymnis et confessiónibus benedicébant Dóminum.
R. Et facta est lætítia magna in pópulo.

[Lectio3]
!1 Mac 1:24-29
24 Et accépit argéntum, et aurum, et vasa concupiscibília: et accépit thesáuros occúltos, quos invénit: et, sublátis ómnibus, ábiit in terram suam;
25 et fecit cædem hóminum, et locútus est in supérbia magna,
26 et factus est planctus magnus in Israël, et in omni loco eórum:
27 et ingemuérunt príncipes et senióres, vírgines et júvenes infirmáti sunt, et speciósitas mulíerum immutáta est.
28 Omnis marítus sumpsit laméntum, et quæ sedébant in thoro maritáli, lugébant:
29 et commóta est terra super habitántes in ea, et univérsa domus Jacob índuit confusiónem.

[Responsory3]
R. In hymnis et confessiónibus benedicébant Dóminum,
* Qui magna fecit in Israël, et victóriam dedit illis Dóminus omnípotens.
V. Ornavérunt fáciem templi corónis áureis, et dedicavérunt altáre Dómino.
R. Qui magna fecit in Israël, et victóriam dedit illis Dóminus omnípotens.
&Gloria
R. Qui magna fecit in Israël, et victóriam dedit illis Dóminus omnípotens.