[Ant 1]
Qui cælórum * cóntines thronum, et abýssos intuéris, Dómine, Rex regum, montes pónderas, terram palmo conclúdis: exáudi nos, Dómine, in gemítibus nostris.

[Lectio1]
Incipit liber Osée Prophétæ
!Osee 1:1-3
1 Verbum Dómini, quod factum est ad Osée, fílium Béeri, in diébus Ozíæ, Jóathan, Achaz, Ezechíæ, regum Juda; et in diébus Jeróboam, fílii Joas, regis Israël. 
2 Princípium loquéndi Dómino in Osée. Et dixit Dóminus ad Osée: Vade, sume tibi uxórem fornicatiónum, quia fórnicans fornicábitur terra a Dómino. 
3 Et ábiit, et accépit Gomer, fíliam Debélaim: et concépit, et péperit ei fílium.

[Responsory1]
@Tempora/Pent01-0:Responsory1

[Lectio2]
!Osee 1:4-7
4 Et dixit Dóminus ad eum: Voca nomen ejus Jézrahel, quóniam adhuc módicum, et visitábo sánguinem Jézrahel super domum Jehu, et quiéscere fáciam regnum domus Israël,
5 et in illa die cónteram arcum Israël in valle Jézrahel. 
6 Et concépit adhuc, et péperit fíliam. Et dixit ei: Voca nomen ejus Absque misericórdia, quia non addam ultra miseréri dómui Israël, sed oblivióne oblivíscar eórum,
7 et dómui Juda miserébor et salvábo eos in Dómino Deo suo; et non salvábo eos in arcu et gládio, et in bello, et in equis, et in equítibus.

[Responsory2]
@Tempora/111-0:Responsory2

[Lectio3]
!Osee 1:8-11
8 Et ablactávit eam quæ erat Absque misericórdia, et concépit, et péperit fílium. 
9 Et dixit: Voca nomen ejus, Non pópulus meus, quia vos non pópulus meus, et ego non ero vester. 
10 Et erit númerus filiórum Israël quasi aréna maris, quæ sine mensúra est, et non numerábitur. Et erit, in loco ubi dicétur eis: Non pópulus meus vos; dicétur eis: Fílii Dei vivéntis. 
11 Et congregabúntur fílii Juda et fílii Israël páriter: et ponent síbimet caput unum, et ascéndent de terra, quia magnus dies Jézrahel.

[Responsory3]
@Tempora/111-0:Responsory3

[Lectio4]
Ex libro sancti Augustíni Epíscopi de Civitáte Dei
!Liber 18, cap. 28.
Osée prophéta, quanto profúndius quidem lóquitur, tanto operósius penetrátur. Sed áliquid inde suméndum est, et hic ex nostra promissióne ponéndum. Et erit, inquit, in loco quo dictum est eis, Non pópulus meus vos; vocabúntur et ipsi fílii Dei vivi. Hoc testimónium prophéticum de vocatióne pópuli Géntium, qui prius non pertinébat ad Deum, étiam Apóstoli intellexérunt.

[Responsory4]
@Tempora/111-0:Responsory4

[Lectio5]
Et quia ipse quoque pópulus Géntium spiritáliter est in fíliis Abrahæ, ac per hoc recte dícitur Israël; proptérea séquitur, et dicit: Et congregabúntur fílii Juda et fílii Israël in idípsum, et ponent síbimet principátum unum, et ascéndent a terra. Hoc si adhuc velímus expónere, elóquii prophétici obtundétur sapor. Recolátur tamen lapis ille anguláris, et duo illi paríetes, unus ex Judǽis, alter ex Géntibus: ille nómine filiórum Juda, iste nómine filiórum Israël, eídem uni principátui suo in idípsum inniténtes, et ascendéntes agnoscántur in terra.

[Responsory5]
@Tempora/111-0:Responsory5

[Lectio6]
Istos autem carnáles Israëlítas, qui nunc nolunt crédere in Christum, póstea creditúros, id est fílios eórum, (nam útique isti in suum locum moriéndo transíbunt) idem prophéta testátur, dicens: Quóniam diébus multis sedébunt fílii Israël sine rege, sine príncipe, sine sacrifício, sine altári, sine sacerdótio, sine manifestatiónibus. Quis non vídeat, nunc sic esse Judǽos?

[Responsory6]
@Tempora/111-0:Responsory6

[Responsory7]
@Tempora/111-0:Responsory7

[Responsory8]
@Tempora/Pent01-0:Responsory8