[Rank]
Sanctissimi Nominis Jesu;;Duplex 2 class;;5;;

[Rule]
9 lectiones
Psalmi Dominica
Antiphonas horas
Psalm5 Vespera=115
Doxology=Nat
Festum Domini

[Ant Vespera]
Omnis * qui invocáverit nomen Dómini, salvus erit.
Sanctum et terríbile * nomen ejus, inítium sapiéntiæ timor Dómini.
Ego autem * in Dómino gaudébo, et exsultábo in Deo Jesu meo.
A solis ortu * usque ad occásum laudábile nomen Dómini.
Sacrificábo * hóstiam laudis, et nomen Dómini invocábo.

[Hymnus Vespera]
v. Jesu, dulcis memória,
Dans vera cordis gáudia:
Sed super mel, et ómnia,
Ejus dulcis præséntia.
_
Nil cánitur suávius,
Nil audítur jucúndius,
Nil cogitátur dúlcius,
Quam Jesus Dei Fílius.
_
Jesu, spes pœniténtibus,
Quam pius es peténtibus!
Quam bonus te quæréntibus!
Sed quid inveniéntibus?
_
Nec lingua valet dícere,
Nec líttera exprímere:
Expértus potest crédere,
Quid sit Jesum dilígere.
_
Sis, Jesu, nostrum gáudium,
Qui es futúrus prǽmium:
Sit nostra in te glória,
Per cuncta semper sǽcula.
Amen.

[Versum 1]
V. Sit nomen Dómini benedíctum, allelúja.
R. Ex hoc nunc et usque in sǽculum, allelúja.

[Ant 1]
Fecit * mihi magna qui potens est, et sanctum nomen ejus, allelúja.

[Oratio]
Deus, qui unigénitum Fílium tuum constituísti humáni géneris Salvatórem, et Jesum vocári jussísti: concéde propítius; ut, cujus sanctum nomen venerámur in terris, ejus quoque aspéctu perfruámur in cælis. 
$Per eumdem

[Invit]
Admirábile nomen Jesu, quod est super omne nomen, * Veníte, adorémus.

[Hymnus Matutinum]
v. Jesu, Rex admirábilis,
Et triumphátor nóbilis,
Dulcédo ineffábilis,
Totus desiderábilis.
_
Quando cor nostrum vísitas,
Tunc lucet ei véritas,
Mundi viléscit vánitas,
Et intus fervet cáritas.
_
Jesu, dulcédo córdium,
Fons vivus, lumen méntium,
Excédens omne gáudium,
Et omne desidérium.
_
Jesum omnes agnóscite,
Amórem ejus póscite:
Jesum ardénter quǽrite,
Quæréndo inardéscite.
_
Te nostra, Jesu, vox sonet,
Nostri te mores éxprimant,
Te corda nostra díligant,
Et nunc, et in perpétuum.
Amen.

[Ant Matutinum]
Dómine, Dóminus noster, * quam admirábile est nomen tuum in univérsa terra!;;8
In nómine Jesu * omne genu flectátur cæléstium, terréstrium, et infernórum.;;18
Confitémini * Dómino, et invocáte nomen ejus: mementóte, quóniam excélsum est nomen ejus.;;23
V. Propter nomen tuum, Dómine, propitiáberis peccáto meo.
R. Multum est enim.
Mémores erunt * nóminis tui, Dómine, in omni generatióne et generatiónem.;;44
Magnificáte * Dóminum mecum, et exaltémus nomen ejus in idípsum.;;45
Omnes gentes, * quascúmque fecísti, vénient, et adorábunt coram te, Dómine, et glorificábunt nomen tuum.;;86
V. Propter glóriam nóminis tui, Dómine, líbera nos.
R. Et propítius esto peccátis nostris propter nomen tuum.
Cantáte Dómino * et benedícite nómini ejus: annuntiáte de die in diem salutáre ejus.;;95
Secúndum nomen tuum, * Deus, sic et laus tua in fines terræ: justítia plena est déxtera tua.;;96
Cantáte Deo, * psalmum dícite nómini ejus: iter fácite ei, qui ascéndit super occásum, Dóminus nomen illi.;;97
V. Afférte Dómino glóriam et honórem.
R. Afférte Dómino glóriam nómini ejus.

[Lectio1]
De Actibus Apostolórum
!Act 3:1-8
1 Petrus autem et Joánnes ascendébant in templum ad horam oratiónis nonam.
2 Et quidam vir, qui erat claudus ex útero matris suæ, bajulabátur; quem ponébant cotídie ad portam templi, quæ dícitur Speciósa, ut péteret eleemósynam ab introëúntibus in templum.
3 Is, cum vidísset Petrum et Joánnem incipiéntes introíre in templum, rogábat ut eleemósynam accíperet.
4 Intuens autem in eum Petrus cum Joánne, dixit: Réspice in nos.
5 At ille intendébat in eos, sperans se áliquid acceptúrum ab eis.
6 Petrus autem dixit: Argéntum et aurum non est mihi: quod autem hábeo, hoc tibi do: In nómine Jesu Christi Nazaréni surge, et ámbula.
7 Et, apprehénsa manu ejus déxtera, allevávit eum, et prótinus consolidátæ sunt bases ejus, et plantæ.
8 Et exsíliens stetit, et ambulábat; et intrávit cum illis in templum ámbulans, et exsíliens, et laudans Deum.

[Responsory1]
R. Ecce concípies, et paries fílium, et vocábis nomen ejus Jesum: 
* Ipse enim salvum fáciet pópulum suum a peccátis eórum.
V. Vocátum est nomen ejus Jesus, quod vocátum est ab Angelo, priúsquam in útero conciperétur.
R. Ipse enim salvum fáciet pópulum suum a peccátis eórum.

[Lectio2]
!Act 3:9-16
9 Et vidit omnis pópulus eum ambulántem, et laudántem Deum.
10 Cognoscébant autem illum, quod ipse erat, qui ad eleemósynam sedébat ad Speciósam portam templi; et impléti sunt stupóre et éxtasi in eo, quod contígerat illi.
11 Cum tenéret autem Petrum et Joánnem, cucúrrit omnis pópulus ad eos ad pórticum, quæ appellátur Salomónis, stupéntes.
12 Videns autem Petrus, respóndit ad pópulum: Viri Israëlítæ, quid mirámini in hoc, aut nos quid intuémini, quasi nostra virtúte aut potestáte fecérimus hunc ambuláre?
13 Deus Abraham, et Deus Isaac, et Deus Jacob, Deus patrum nostrórum glorificávit Fílium suum Jesum, quem vos quidem tradidístis et negástis ante fáciem Piláti, judicánte illo dimítti.
14 Vos autem sanctum et justum negástis, et petístis virum homicídam donári vobis:
15 Auctórem vero vitæ interfecístis, quem Deus suscitávit a mórtuis, cujus nos testes sumus.
16 Et in fide nóminis ejus, hunc, quem vos vidístis et nostis, confirmávit nomen ejus: et fides, quæ per eum est, dedit íntegram sanitátem istam in conspéctu ómnium vestrum.

[Responsory2]
R. Benedíctum est nomen tuum, Deus patrum nostrórum, qui cum irátus fúeris, misericórdiæ recordáberis, 
* Et in témpore tribulatiónis peccáta dimíttis.
V. Et benedíctum nomen majestátis tuæ in ætérnum, qui facis mirabília solus.
R. Et in témpore tribulatiónis peccáta dimíttis.

[Lectio3]
!Act 4:5-12
5 Factum est autem in crástinum, ut congregaréntur príncipes eórum, et senióres, et scribæ, in Jerúsalem:
6 et Annas princeps sacerdótum, et Cáiphas, et Joánnes, et Alexánder, et quotquot erant de génere sacerdotáli.
7 Et statuéntes eos in médio, interrogábant: In qua virtúte, aut in quo nómine fecístis hoc vos?
8 Tunc replétus Spíritu Sancto Petrus, dixit ad eos: Príncipes pópuli, et senióres, audíte:
9 si nos hódie diiudicámur in benefácto hóminis infírmi, in quo iste salvus factus est,
10 notum sit ómnibus vobis, et omni plebi Israël, quia in nómine Dómini nostri Jesu Christi Nazaréni, quem vos crucifixístis, quem Deus suscitávit a mórtuis, in hoc iste adstat coram vobis sanus.
11 Hic est lapis, qui reprobátus est a vobis ædificántibus, qui factus est in caput ánguli:
12 et non est in álio áliquo salus. Nec enim áliud nomen est sub cælo datum homínibus, in quo opórteat nos salvos fíeri.

[Responsory3]
R. Laudábo nomen tuum assídue, 
* Et collaudábo illud in confessióne.
V. Lætábor et exsultábo in te: psallam nómini tuo, Altíssime.
R. Et collaudábo illud in confessióne.
&Gloria
R. Et collaudábo illud in confessióne.

[Lectio4]
Sermo sancti Bernárdi Abbátis
!Sermo 15 super Cantica, circa medium
Non otióse Spíritus Sanctus nomen Sponsi óleo cómparat, cum ita dóceat sponsam ad Sponsum clamáre: Oleum effúsum nomen tuum. Oleum enim lucet, pascit et ungit. Fovet ignem, nutrit carnem, lenit dolórem: lux, cibus, medicína. Vide idem nunc et de Sponsi nómine: Lucet prædicátum, pascit recogitátum, invocátum lenit et ungit. Et percurrámus síngula. Unde putas in toto orbe tanta et tam súbita fídei lux, nisi de prædicáto nómine Jesu? Nonne in hujus nóminis luce Deus nos vocávit in admirábile lumen suum; quibus illuminátis, et in lúmine isto vidéntibus lumen, dicat mérito Paulus: Fuístis aliquándo ténebræ, nunc autem lux in Dómino?

[Responsory4]
R. Sperent in te, qui novérunt nomen tuum: 
* Quóniam non dereliquísti quæréntes te, Dómine.
V. Exsúrge, Dómine, ádjuva nos, et líbera nos propter nomen tuum.
R. Quóniam non dereliquísti quæréntes te, Dómine.

[Lectio5]
Hoc dénique nomen coram régibus, et géntibus, et fíliis Israël portáre jussus est idem Apóstolus; et portábat nomen tamquam lumen, et illuminábat pátriam, et clamábat ubíque: Nox præcéssit, dies autem appropinquávit. Abiciámus ergo ópera tenebrárum, et induámur arma lucis, sicut in die honéste ambulémus. Et monstrábat ómnibus lucérnam super candelábrum, annúntians in omni loco Jesum, et hunc crucifíxum. Quómodo lux ista resplénduit ac perstrínxit cunctórum intuéntium óculos, quando de ore Petri, tamquam fulgur egrédiens, claudi uníus corporáles plantas solidávit et bases, multósque spirituáliter cæcos illuminávit? Numquid non ignem sparsit, cum ait: In nómine Jesu Christi Nazaréni surge et ámbula?

[Responsory5]
R. Confiteámur nómini tuo magno, 
* Quóniam terríbile et sanctum est.
V. Hi in cúrribus, et hi in equis, nos autem in nómine Dómini, Dei nostri, invocábimus.
R. Quóniam terríbile et sanctum est.

[Lectio6]
Nec tantum lux est nomen Jesu, sed est et cibus. An non tóties confortáris, quóties recordáris? Quid æque méntem cogitántis impínguat? Quid ita exercitátos réparat sensus, virtútes róborat, végetat mores bonos atque honéstos, castas fovet affectiónes? Aridus est omnis ánimæ cibus, si non óleo isto infúnditur; insípidus est, si non hoc sale condítur. Si scribas, non sapit mihi, nisi légero ibi Jesum. Si dísputes aut cónferas, non sapit mihi, nisi sonúerit ibi Jesus. Jesus mel in ore, in aure melos, in corde júbilus. Sed est et medicína. Tristátur áliquis nostrum? Véniat in cor ejus Jesus, et inde sáliat in os. Et ecce ad exórtum nóminis lumen, núbilum omne díffugit, redit serénum. Lábitur quis in crimen? currit ínsuper ad láqueum mortis desperándo? Nonne, si ínvocet nomen vitæ, conféstim respirábit ad vitam?

[Responsory6]
R. Læténtur omnes, qui sperant in te, Dómine, in ætérnum exsultábunt, et habitábis in eis, et gloriabúntur in te omnes, 
* Qui díligunt nomen tuum.
V. Dómine, in lúmine vultus tui ambulábunt, et in nómine tuo exsultábunt tota die.
R. Qui díligunt nomen tuum.
&Gloria
R. Qui díligunt nomen tuum.

[Lectio7]
Léctio sancti Evangélii secúndum Lucam
!Luc 2:21
In illo témpore: Postquam consummáti sunt dies octo, ut circumciderétur Puer: vocátum est nomen ejus Jesus. Et réliqua.
_
Homilía sancti Bernárdi Abbátis
!Sermo 1 de Circumcisione
Magnum et mirábile sacraméntum! Circumcíditur Puer, et vocátur Jesus. Quid sibi vult ista connéxio? Circumcísio nempe magis salvándi, quam Salvatóris esse vidétur; et Salvatórem circumcídere pótius decet, quam circumcídi. Sed agnósce mediatórem Dei et hóminum, qui ab ipso nativitátis suæ exórdio divínis humána sóciat, ima summis. Náscitur ex mulíere, sed cui fecunditátis fructus sic accédat, ut non décidat flos virginitátis. Pannis invólvitur; sed panni ipsi angélicis láudibus honorántur. Abscónditur in præsépio; sed próditur radiánte stella de cælo. Sic et circumcísio veritátem suscéptæ probat humanitátis; et nomen, quod est super omne nomen, glóriam índicat majestátis. Circumcíditur tamquam verus Abrahæ fílius; Jesus vocátur tamquam verus Fílius Dei.

[Responsory7]
R. Tribulatiónem et dolórem invéni: 
* Et nomen Dómini invocávi.
V. Turris fortíssima nomen Dómini, in ipso sperávi, et adjútus sum.
R. Et nomen Dómini invocávi.

[Lectio8]
Neque enim ad ínstar priórum meus iste Jesus nomen vácuum aut ináne portat: non est in eo magni nóminis umbra, sed véritas. Cǽlitus síquidem índitum nomen Evangelísta testátur, quod vocátum est ab Angelo, priúsquam in útero conciperétur. Et atténde verbi profunditátem: Postquam natus est Jesus, Jesus vocátur ab homínibus, qui vocátus est ab Angelo, priúsquam in útero conciperétur. Idem quippe et Angeli Salvátor et hóminis; sed hóminis ab incarnatióne, Angeli ab inítio creatúræ. Vocátum est, ait, nomen ejus Jesus, quod vocátum est ab Angelo. In ore ergo duórum vel trium téstium stat omne verbum; et ipsum, quod in Prophéta abbreviátum, maniféstius in Evangélio légitur caro factum.

[Responsory8]
R. Exspectábo nomen tuum, Dómine, 
* Quóniam bonum est in conspéctu sanctórum tuórum.
V. Ut confiteámur nómini sancto tuo, et gloriémur in laude tua.
R. Quóniam bonum est in conspéctu sanctórum tuórum.
&Gloria
R. Quóniam bonum est in conspéctu sanctórum tuórum.

[Lectio9]
!Sermo 2 de Circumcisione
Mérito sane, dum circumcíditur puer, qui natus est nobis, Salvátor vocátur; quod vidélicet ex hoc jam cœ́perit operári salútem nostram, immaculátum illum pro nobis sánguinem fundens. Neque enim jam quǽrere est Christiánis, cur volúerit Dóminus Christus circumcídi. Propter hoc síquidem circumcísus est, propter quod natus, propter quod passus. Nihil horum propter se, sed ómnia propter eléctos. Nec in peccáto génitus, nec a peccáto circumcísus, nec mórtuus est pro peccáto suo; magis autem propter delícta nostra. Quod vocátum est, inquit, ab Angelo, priúsquam in útero conciperétur. Vocátum plane, non impósitum: nempe hoc ei nomen est ab ætérno. A natúra própria habet, ut sit Salvátor: innátum est ei nomen hoc, non índitum ab humána vel angélica creatúra.
&teDeum

[Versum 0]
V. Sit nomen Dómini benedictum.
R. Ex hoc nunc et usque in sǽculum.

[Ant Laudes]
Oleum effúsum * nomen tuum, ídeo adolescéntulæ dilexérunt te.
Scitóte, * quia Dóminus ipse est Deus, cujus nomen in ætérnum.
Sitívit * ánima mea ad nomen sanctum tuum, Dómine.
Benedíctum * nomen glóriæ tuæ sanctum, et laudábile, et superexaltátum in sǽcula.
Júvenes et vírgines, * senes cum junióribus laudáte nomen Dómini, quia exaltátum est nomen ejus solíus.

[Capitulum Laudes]
!Phil 2:8-10
v. Fratres: Christus humiliávit semetípsum, factus obédiens usque ad mortem, mortem autem crucis. Propter quod et Deus exaltávit illum, et donávit illi nomen, quod est super omne nomen, ut in nómine Jesu omne genu flectátur.
$Deo gratias

[Hymnus Laudes]
v. Jesu decus angélicum,
In aure dulce cánticum,
In ore mel miríficum,
In corde nectar cǽlicum.
_
Qui te gustant, esúriunt;
Qui bibunt, adhuc sítiunt;
Desideráre nésciunt,
Nisi Jesum, quem díligunt.
_
O Jesu mi dulcíssime,
Spes suspirántis ánimæ!
Te quærunt piæ lácrimæ,
Te clamor mentis íntimæ.
_
Mane nobíscum, Dómine,
Et nos illústra lúmine;
Pulsa mentis calígine,
Mundum reple dulcédine.
_
Jesu, flos Matris Vírginis,
Amor nostræ dulcédinis,
Tibi laus, honor nóminis,
Regnum beatitúdinis.
Amen.

[Versum 2]
V. Adjutórium nostrum in nomine Dómini.
R. Qui fecit cælum et terram.

[Ant 2]
Dedit se, * ut liberáret pópulum, et acquíreret sibi nomen ætérnum, allelúja.

[Lectio Prima]
!Col 3:17
v. Omne quodcúmque fácitis in verbo, aut in ópere: ómnia in nómine Dómini Jesu Christi fácite, grátias agéntes Deo et Patri per ipsum.

[Responsory Tertia]
R.br. Sit nomen Dómini benedíctum, * Allelúja, allelúja.
R. Sit nomen Domini benedíctum, * Allelúja, allelúja.
V. Ex hoc nunc et usque in sǽculum.
R. Allelúja, allelúja.
&Gloria
R. Sit nomen Dómini benedíctum, * Allelúja, allelúja.
_
V. Afférte Dómino glóriam et honórem, allelúja.
R. Afférte Dómino glóriam nómini ejus, allelúja.

[Capitulum Sexta]
!Phil 2:10-11
v. In nómine Jesu omne genu flectátur cæléstium, terréstrium, et infernórum: et omnis lingua confiteátur, quia Dóminus Jesus Christus in glória est Dei Patris.
$Deo gratias

[Responsory Sexta]
R.br. Afférte Dómino glóriam et honórem, * Allelúja, allelúja.
R. Afférte Dómino glóriam et honórem, * Allelúja, allelúja.
V. Afférte Dómino glóriam nómini ejus.
R. Allelúja, allelúja.
&Gloria
R. Afférte Dómino glóriam et honórem, * Allelúja, allelúja.
_
V. Magnificáte Dóminum mecum, allelúja.
R. Et exaltémus nomen ejus in idípsum, allelúja.

[Capitulum Nona]
@:Lectio Prima
$Deo gratias

[Responsory Nona]
R.br. Magnificáte Dóminum mecum, * Allelúja, allelúja.
R. Magnificáte Dóminum mecum, * Allelúja, allelúja.
V. Et exaltémus nomen ejus in idípsum.
R. Allelúja, allelúja.
&Gloria
R. Magnificáte Dóminum mecum, * Allelúja, allelúja.
_
V. Adjutórium nostrum in nomine Dómini, allelúja.
R. Qui fecit cælum et terram, allelúja.

[Versum 3]
@:Versum 1

[Ant 3]
Vocábis * nomen ejus Jesum; ipse enim salvum fáciet pópulum suum a peccátis eórum, allelúja.