[Rank]
Sacratissimi Cordis Domini Nostri Jesu Christi;;Duplex I classis cum Octava privilegiata III ordinis;;6.51

[Rank] (rubrica 196)
Sacratissimi Cordis Domini Nostri Jesu Christi;;Duplex I classis;;6

[Rule]
9 lectiones
Psalmi Dominica
Antiphonas horas
Doxology=Heart
Prima=53
Festum Domini

[Ant Vespera]
Suávi jugo tuo * domináre, Dómine, in médio inimicórum tuórum.;;109
Miséricors * et miserátor Dóminus: escam dedit timéntibus se.;;110
Exórtum est * in ténebris lumen rectis; miséricors et miserátor Dóminus.;;111
Quid retríbuam * Dómino pro ómnibus quæ retríbuit mihi?;;115
Apud Dóminum * propitiátio est et copiósa apud eum redémptio.;;129

[Hymnus Vespera]
v. En, ut supérba críminum
Et sæva nostrórum cohors
Cor sauciávit ínnocens
Meréntis haud tale Dei!
_
Vibrántis hastam mílitis
Peccáta nostra dírigunt,
Ferrúmque diræ cúspidis
Mortále crimen ácuit.
_
Ex Corde scisso Ecclésia,
Christo jugáta, náscitur:
Hoc óstium arcæ in látere est
Génti ad salútem pósitum.
_
Ex hoc perénnis grátia,
Ceu septifórmis flúvius,
Stolas ut illic sórdidas
Lavémus Agni in sánguine.
_
Turpe est redíre ad crímina,
Quæ Cor beátum lácerent:
Sed æmulémur córdibus
Flammas amóris índices.
_
Jesu, tibi sit glória,
Qui Corde fundis grátiam,
Cum Patre, et almo Spíritu,
In sempitérna sǽcula.
Amen.

[Versum 1]
V. Tóllite jugum meum super vos et díscite a me.
R. Quia mitis sum et húmilis Corde.

[Ant 1]
Ignem * veni míttere in terram, et quid volo nisi ut accendátur?

[Oratio]
Deus, qui nobis in Corde Fílii tui, nostris vulneráto peccátis, infinítos dilectiónis thesáuros misericórditer largíri dignáris; concéde, quǽsumus, ut illi devótum pietátis nostræ præstántes obséquium, dignæ quoque satisfactiónis exhibeámus offícium.
$Per eumdem

[Invit]
Cor Jesu amóre nostri vulnerátum * Veníte, adorémus.

[Hymnus Matutinum]
v. Auctor beáte sǽculi,
Christe, Redémptor ómnium,
Lumen Patris de lúmine,
Deúsque verus de Deo.
_
Amor coégit te tuus
Mortále corpus súmere,
Ut novus Adam rédderes,
Quod vetus ille abstúlerat.
_
Ille amor, almus ártifex
Terræ marísque, et síderum,
Erráta patrum míserans,
Et nostra rumpens víncula.
_
Non Corde discédat tuo
Vis illa amóris íncliti:
Hoc fonte gentes háuriant
Remissiónis grátiam.
_
Percússum ad hoc est láncea,
Passúmque ad hoc est vúlnera:
Ut nos laváret sórdibus,
Unda fluénte, et sánguine.
_
* Jesu, tibi sit glória,
Qui Corde fundis grátiam,
Cum Patre, et almo Spíritu,
In sempitérna sǽcula.
Amen.

[Ant Matutinum]
Cogitatiónes * Cordis ejus in generatióne et generatiónem.;;32
Apud te * est fons vitæ; torrénte voluptátis tuæ potábis nos, Dómine.;;35
Homo * pacis meæ, qui edébat panes meos, magnificávit super me supplantatiónem.;;40
V. Tóllite jugum meum super vos et díscite a me.
R. Quia mitis sum et húmilis Corde.
Rex omnis terræ * Deus; regnábit super gentes.;;46;
Dum anxiarétur * Cor meum, in petra exaltásti me.;;60
Secúndum multitúdinem * dolórum meórum in Corde meo, consolatiónes tuæ lætificavérunt ánimam meam.;;93
V. Ego dixi, Dómine, miserére mei.
R. Sana ánimam meam quia peccávi tibi.
Qui dilígitis Dóminum, * confitémini memóriæ sanctificatiónis ejus.;;96
Vidérunt * omnes términi terræ salutáre Dei nostri.;;97
Psallam tibi * in natiónibus, quia magna est super cælos misericórdia tua.;;107
V. Memóriam fecit mirabílium suórum miserátor Dóminus.
R. Escam dedit timéntibus se.

[Lectio1]
De Jeremía Prophéta
!Jer 24:5-7
5 Hæc dicit Dóminus, Deus Israël: Cognóscam transmigratiónem Juda, quam emísi de loco isto in terram Chaldæórum, in bonum.
6 Et ponam óculos meos super eos ad placándum, et redúcam eos in terram hanc; et ædificábo eos, et non déstruam; et plantábo eos et non evéllam.
7 Et dabo eis cor ut sciant me, quia ego sum Dóminus; et erunt mihi in pópulum, et ego ero eis in Deum, quia reverténtur ad me in toto corde suo.

[Responsory1]
R. Fériam eis pactum sempitérnum et non désinam eis benefácere et timórem meum dabo in corde eórum
* Ut non recédant a me.
V. Et lætábor super eis cum bene eis fécero in toto Corde meo.
R. Ut non recédant a me.

[Lectio2]
!Jer 30:18-19; 30:21-24
18 Hæc dicit Dóminus: Ecce ego convértam conversiónem tabernaculórum Jacob, et tectis ejus miserébor, et ædificábitur cívitas in excélso suo, et templum juxta órdinem suum fundábitur,
19 et egrediétur de eis laus, voxque ludéntium.
21 Et erit dux ejus ex eo, et princeps de médio ejus producétur; et, applicábo eum et accédet ad me. Quis enim iste est qui ápplicet cor suum ut appropínquet mihi? ait Dóminus.
22 Et éritis mihi in pópulum, et ego ero vobis in Deum.
23 Ecce turbo Dómini, furor egrédiens, procélla ruens; in cápite impiórum conquiéscet.
24 Non avértet iram indignatiónis Dóminus, donec fáciat et cómpleat cogitatiónem Cordis sui: in novíssimo diérum intellegétis ea.

[Responsory2]
R. Si inimícus meus maledixísset mihi, sustinuíssem útique
* Tu vero homo unánimis qui simul mecum dulces capiébas cibos.
V. Et si is qui me óderat super me magna locútus fuísset, abscondíssem me fórsitan ab eo.
R. Tu vero homo unánimis qui simul mecum dulces capiébas cibos.

[Lectio3]
!Jer 31:1-3; 31:31-33
1 In témpore illo, dicit Dóminus, ero Deus univérsis cognatiónibus Israël, et ipsi erunt mihi in pópulum.
2 Hæc dicit Dóminus: Invénit grátiam in desérto pópulus qui remánserat a gládio; vadet ad réquiem suam Israël.
3 Longe Dóminus appáruit mihi. Et in caritáte perpétua diléxi te: ídeo attráxi te, míserans.
31 Ecce dies vénient, dicit Dóminus: et fériam dómui Israël et dómui Juda fœdus novum:
32 non secúndum pactum, quod pépigi cum pátribus eórum in die, qua apprehéndi manum eórum, ut edúcerem eos de Terra Ægýpti: pactum quod írritum fecérunt, et ego dominátus sum eórum, dicit Dóminus.
33 Sed hoc erit pactum, quod fériam cum domo Israël: post dies illos dicit Dóminus: Dabo legem meam in viscéribus eórum, et in corde eórum scribam eam: et ero eis in Deum, et ipsi erunt mihi in pópulum.

[Responsory3]
R. Cum essémus mórtui peccátis, convivificávit nos Deus in Christo
* Propter nímiam caritátem suam qua diléxit nos.
V. Ut osténderet in sǽculis superveniéntibus abundántes divítias grátiæ suæ.
R. Propter nímiam caritátem suam qua diléxit nos.
&Gloria
R. Propter nímiam caritátem suam qua diléxit nos.

[Lectio4]
Inter mira sacræ doctrínæ pietatísque increménta, quibus divínæ Sapiéntiæ consília clárius in dies Ecclésiæ manifestántur, vix áliud magis conspícuum est quam triumphális progréssio cultus sacratíssimi Cordis Jesu. Sǽpius quidem, priórum decúrsu témporum, Patres, Doctóres, Sancti, Redemptóris nostri amórem celebrárunt: vulnus in látere Christi apértum ómnium gratiárum arcánum dixérunt fontem. At inde a médio ævo, cum tenerióre quadam erga sanctíssimam Salvatóris Humanitátem religióne fidéles áffici cœpti sunt, ánimæ contemplatívæ per plagam illam ad ipsum Cor, amóre hóminum vulnerátum, penetráre fere solébant. Atque ex eo témpore hæc contemplátio sanctíssimis quibúsque ita familiáris evásit, ut neque régio neque ordo religiósus sit, in quibus non insígnia, hac ætáte, ejus reperiántur testimónia. Próximis demum sǽculis, eóque potíssimum témpore quo hærétici, sub falsæ pietátis título, a sanctíssima Eucharístia Christiános detérrere conabántur, cultus sacratíssimo Cordi públice exhibéri cœptus est, ópera imprímis sancti Joánnis Eudes, qui auctor litúrgici cultus sacrórum Córdium Jesu et Maríæ haud immérito nuncupátur.

[Responsory4]
R. Prope est Dóminus ómnibus invocántibus eum,
* Omnibus invocántibus eum in veritáte.
V. Miserátor et miséricors Dóminus, pátiens et multum miséricors.
R. Omnibus invocántibus eum in veritáte.

[Lectio5]
Verum, ad cultum sacratíssimi Cordis Jesu plene perfectéque constituéndum, eundémque per totum orbem propagándum, Deus ipse sibi instruméntum elégit humíllimam ex órdine Visitatiónis vírginem, sanctam Margarítam Maríam Alacóque, cui, a prima quidem ætáte jam in Eucharístiæ Sacraméntum amóre flagránti, Christus Dóminus sæpenúmero appárens, divíni Cordis sui et divítias et optáta significáre dignátus est. Quarum apparitiónum celebérrima illa est, qua ei ante Eucharístiam oránti Jesus conspiciéndum se dedit, sacratíssimum Cor osténdit et conquéstus quod, pro imménsa sua caritáte, nihil nisi ingratórum hóminum contumélias recíperet, ipsi præcépit ut novum festum, féria sexta post Octávam Córporis Christi, instituéndum curáret, quo Cor suum honóre débito colerétur, atque injúriæ sibi in Sacraménto amóris a peccatóribus illátæ dignis expiaréntur obséquiis. Quot autem quantásque Dei fámula in Christi mandátis exsequéndis expérta sit difficultátes, nemo est qui ignóret; sed ab ipso Dómino confirmáta, atque a religiósis ánimæ suæ moderatóribus, qui incredíbili quodam ardóre ad hunc cultum promovéndum laborárunt, strénue adjúta, múnere sibi cǽlitus commísso fidéliter fungi ad mortem usque non déstitit.

[Responsory5]
R. Confíteor tibi, Pater, Dómine cæli et terræ, quia abscondísti hæc a sapiéntibus et prudéntibus
* Et revelásti ea párvulis.
V. Ita, Pater, quóniam sic fuit plácitum ante te.
R. Et revelásti ea párvulis.

[Lectio6]
Anno tandem millésimo septingentésimo sexagésimo quinto, Clemens décimus tértius Póntifex Máximus offícium et missam in honórem sacratíssimi Cordis Jesu approbávit; Pius vero nonus festum ad univérsam Ecclésiam exténdit. Exínde, cultus sacratíssimi Cordis, quasi flumen exúndans, prolútis impediméntis ómnibus, per totum se orbem effúdit, et, novo illucescénte sǽculo, jubilǽo indícto, Leo décimus tértius humánum genus univérsum sacratíssimo Cordi devótum vóluit. Quæ consecrátio, in ómnibus quidem cathólici orbis ecclésiis, solémni ritu perácta, ingens áttulit devotiónis hujus increméntum, et ad eam non solum pópulos, verum étiam singuláres famílias addúxit, quæ Divíno Cordi innumerábiles se dévovent, regióque ejus império subíciunt. Dénique, Pius undécimus Póntifex Máximus, quo plénius festi solémnitas pópuli christiáni devotióni tam late paténti respondéret, sacratíssimi Cordis Jesu festum ad ritum dúplicem primæ classis cum octáva evéxit; ac prætérea, ut violáta jura Christi summi Regis ac Dómini amantíssimi resarciréntur, populorúmque peccáta defleréntur, eódem festo die piaculárem precatiónem in ómnibus christiáni orbis templis quotánnis recitándam mandávit.

[Responsory6]
R. Omnes gentes quascúmque fecísti, vénient
* Et adorábunt coram te, Dómine.
V. Et glorificábunt nomen tuum, quóniam magnus es tu, et fáciens mirabília.
R. Et adorábunt coram te, Dómine.
&Gloria
R. Et adorábunt coram te, Dómine.

[Lectio7]
Léctio sancti Evangélii secúndum Joánnem
!Joannes 19:31-37
In illo témpore: Judǽi, quóniam parascéve erat, ut non remanérent in cruce córpora sábbato (erat enim magnus dies ille sábbati) rogavérunt Pilátum, ut frangeréntur eórum crura et tolleréntur. Et réliqua.
_
Homilía sancti Bonaventúræ Epíscopi
!Liber de ligno vitæ, num. 30
Ut de látere Christi dormiéntis in cruce formarétur Ecclésia, et Scriptúra implerétur quæ dicit: Vidébunt in quem transfixérunt, divína est ordinatióne indúltum ut unus mílitum láncea latus illud sacrum aperiéndo perfóderet, quátenus sánguine cum aqua manánte, prétium effunderétur nostræ salútis quod a fonte scílicet Cordis arcáno profúsum, vim daret sacraméntis Ecclésiæ ad vitam grátiæ conferéndam, essétque jam in Christo vivéntibus póculum fontis vivi, saliéntis in vitam ætérnam. Surge ígitur, ánima amíca Christi, vigiláre non cesses, ibi os appóne, ut háurias aquas de fóntibus salvatóris.

[Responsory7]
R. Ego si exaltátus fúero a terra
* Omnia traham ad meípsum.
V. Hoc autem dicébat signíficans qua morte esset moritúrus.
R. Omnia traham ad meípsum.

[Lectio8]
!De vite mystica, cap. 3
Quia semel vénimus ad Cor Dómini Jesu dulcíssimi, et bonum est nos hic esse, non fácile evellámur ab eo. O quam bonum et jucúndum habitáre in Corde hoc. Bonus thesáurus, pretiósa margaríta Cor tuum, óptime Jesu, quam, fosso agro córporis tui, invenímus. Quis hanc margarítam abíciat? Quin pótius, dabo omnes margarítas, cogitatiónes et affectiónes meas commutábo et comparábo illam mihi, jactans omnem cogitátum meum in Cor boni Jesu, et sine fallácia illud me enútriet. Hoc ígitur tuo et meo Corde, dulcíssime Jesu, invénto, orábo te Deum meum: admítte in sacrárium exauditiónis preces meas: immo me totum trahe in Cor tuum.

[Responsory8]
R. Simus ergo imitatóres Dei
* Et ambulémus in dilectióne.
V. Sicut et Christus diléxit nos et trádidit semetípsum pro nobis.
R. Et ambulémus in dilectióne.
&Gloria
R. Et ambulémus in dilectióne.

[Lectio9]
Ad hoc enim perforátum est latus tuum, ut nobis páteat intróitus. Ad hoc vulnerátum est Cor tuum, ut in illo ab exterióribus turbatiónibus absolúti habitáre possímus. Nihilóminus et proptérea vulnerátum est, ut per vulnus visíbile, vulnus amóris invisíbile videámus. Quómodo hic ardor mélius posset osténdi, nisi quod non solum corpus, verum étiam ipsum Cor láncea vulnerári permísit? Carnále ergo vulnus, vulnus spirituále osténdit. Quis illud Cor tam vulnerátum non díligat? quis tam amántem non rédamet? quis tam castum non amplectátur? Nos ígitur adhuc in carne manéntes, quantum póssumus, amántem redamémus, amplectámur vulnerátum nostrum, cujus ímpii agrícolæ fodérunt manus et pedes, latus et Cor; oremúsque ut cor nostrum, adhuc durum et impœ́nitens, amóris sui vínculo constríngere et jáculo vulneráre dignétur.
&teDeum

[Versum 0]
V. Miserátor et miséricors Dóminus.
R. Longánimis et multum miséricors.

[Ant Laudes]
Unus mílitum * láncea latus ejus apéruit et contínuo exívit sanguis et aqua.
Stans Jesus * clamábat dicens: Si quis sitit, véniat ad me et bibat.
In caritáte perpétua * diléxit nos Deus, ídeo, exaltátus a terra, attráxit nos ad Cor suum, míserans.
Veníte ad me * omnes qui laborátis et oneráti estis et ego refíciam vos.
Fili, * præbe mihi cor tuum, et óculi tui custódiant vias meas.

[Capitulum Laudes]
!Eph 3:8-9
v. Fratres: Mihi ómnium sanctórum mínimo data est grátia hæc, in géntibus evangelizáre investigábiles divítias Christi; et illumináre omnes, quæ sit dispensátio sacraménti abscónditi a sǽculis in Deo.
$Deo gratias

[Hymnus Laudes]
v. Cor, arca legem cóntinens
Non servitútis véteris,
Sed grátiæ, sed véniæ,
Sed et misericórdiæ.
_
Cor, sanctuárium novi
Intemerátum fœ́deris,
Templum vetústo sánctius,
Velúmque scisso utílius.
_
Te vulnerátum cáritas
Ictu paténti vóluit,
Amóris invisíbilis
Ut venerémur vúlnera.
_
Hoc sub amóris sýmbolo
Passus cruénta et mýstica,
Utrúmque sacrifícium
Christus sacérdos óbtulit.
_
Quis non amántem rédamet?
Quis non redémptus díligat,
Et Corde in isto séligat
Ætérna tabernácula?
_
Jesu, tibi sit glória,
Qui Corde fundis grátiam,
Cum Patre, et almo Spíritu,
In sempitérna sǽcula.
Amen.

[Versum 2]
V. Hauriétis aquas in gáudio.
R. De fóntibus Salvatóris.

[Ant 2]
Facta sunt * enim hæc ut Scriptúra implerétur quæ dicit: Vidébunt in quem transfixérunt.

[Lectio Prima]
!Eph 3:17-19
v. In caritáte radicáti et fundáti, ut possítis comprehéndere cum ómnibus sanctis, quæ sit latitúdo et longitúdo, et sublímitas et profúndum; scire étiam supereminéntem sciéntiæ caritátem Christi, ut impleámini in omnem plenitúdinem Dei.

[Responsory Tertia]
R.br. Tóllite jugum meum super vos * Et díscite a me.
R. Tóllite jugum meum super vos * Et díscite a me.
V. Quia mitis sum et húmilis Corde.
R. Et díscite a me.
&Gloria
R. Tóllite jugum meum super vos * Et díscite a me.
_
V. Ego dixi: Dómine, miserére mei.
R. Sana ánimam meam quia peccávi tibi.

[Capitulum Sexta]
!Eph 3:14-17
v. Hujus rei grátia flecto génua mea ad Patrem Dómini nostri Jesu Christi, ut det vobis secúndum divítias glóriæ suæ virtúte corroborári per Spíritum ejus in interiórem hóminem: Christum habitáre per fidem in córdibus vestris.
$Deo gratias

[Responsory Sexta]
R.br. Ego dixi: Dómine, * Miserére mei.
R. Ego dixi: Dómine, * Miserére mei.
V. Sana ánimam meam quia peccávi tibi.
R. Miserére mei.
&Gloria
R. Ego dixi: Dómine, * Miserére mei.
_
V. Memóriam fecit mirabílium suórum miserátor Dóminus.
R. Escam dedit timéntibus se.

[Capitulum Nona]
!Eph 3:17-19
v. In caritáte radicáti et fundáti, ut possítis comprehéndere cum ómnibus sanctis, quæ sit latitúdo et longitúdo, et sublímitas et profúndum; scire étiam supereminéntem sciéntiæ caritátem Christi, ut impleámini in omnem plenitúdinem Dei.
$Deo gratias

[Responsory Nona]
R.br. Memóriam fecit mirabílium suórum * Miserátor Dóminus.
R. Memóriam fecit mirabílium suórum * Miserátor Dóminus.
V. Escam dedit timéntibus se.
R. Miserátor Dóminus.
&Gloria
R. Memóriam fecit mirabílium suórum * Miserátor Dóminus.
_
V. Hauriétis aquas in gáudio.
R. De fóntibus Salvatóris.

[Ant Vespera 3]
Unus mílitum * láncea latus ejus apéruit et contínuo exívit sanguis et aqua.;;109
Stans Jesus * clamábat dicens: Si quis sitit, véniat ad me et bibat.;;110
In caritáte perpétua * diléxit nos Deus, ídeo, exaltátus a terra, attráxit nos ad Cor suum, míserans.;;115
Veníte ad me * omnes qui laborátis et oneráti estis et ego refíciam vos.;;127
Fili, * præbe mihi cor tuum, et óculi tui custódiant vias meas.;;147

[Versum 3]
V. Hauriétis aquas in gáudio.
R. De fóntibus Salvatóris.

[Ant 3]
Ad Jesum autem * cum veníssent, ut vidérunt eum jam mórtuum, non fregérunt ejus crura, sed unus mílitum láncea latus ejus apéruit et contínuo exívit sanguis et aqua.

[Oratio 3]
Protéctor in te sperántium, Deus, sine quo nihil est válidum, nihil sanctum; multíplica super nos misericórdiam tuam; ut, te rectóre, te duce, sic transeámus per bona temporália, ut non amittámus ætérna.
$Per Dominum

[Octava 1]
!Commemoratio pro Octava SSmi Cordis D.N.J.C
Ant. Ignem * veni míttere in terram, et quid volo nisi ut accendátur?
_
V. Tóllite jugum meum super vos et díscite a me.
R. Quia mitis sum et húmilis Corde.
_
$Oremus
Deus, qui nobis in Corde Fílii tui, nostris vulneráto peccátis, infinítos dilectiónis thesáuros misericórditer largíri dignáris; concéde, quǽsumus, ut illi devótum pietátis nostræ præstántes obséquium, dignæ quoque satisfactiónis exhibeámus offícium.
$Per eumdem

[Octava 2]
!Commemoratio pro Octava SSmi Cordis D.N.J.C
Ant. Facta sunt * enim hæc ut Scriptúra implerétur quæ dicit: Vidébunt in quem transfixérunt.
_
V. Hauriétis aquas in gáudio.
R. De fóntibus Salvatóris.
_
$Oremus
Deus, qui nobis in Corde Fílii tui, nostris vulneráto peccátis, infinítos dilectiónis thesáuros misericórditer largíri dignáris; concéde, quǽsumus, ut illi devótum pietátis nostræ præstántes obséquium, dignæ quoque satisfactiónis exhibeámus offícium.
$Per eumdem

[Octava 3]
!Commemoratio pro Octava SSmi Cordis D.N.J.C
Ant. Ad Jesum autem * cum venissent, ut vidérunt eum jam mortuum, non fregérunt ejus crura, sed unus militum lancea latus ejus apéruit et continuo exívit sanguis et aqua.
_
V. Hauriétis aquas in gáudio.
R. De fóntibus Salvatóris.
_
$Oremus
Protéctor in te sperántium, Deus, sine quo nihil est válidum, nihil sanctum; multíplica super nos misericórdiam tuam; ut, te rectóre, te duce, sic transeámus per bona temporália, ut non amittámus ætérna.
$Per Dominum